Выберите язык
Andijon viloyatida iste’molchilarning huquq va qonuniy manfaatlarini himoya qilish, aholiga ko‘rsatilayotgan xizmatlar sifati va xavfsizligini ta’minlash borasida amalga oshirilayotgan ishlar hamda o‘tkazilgan monitoring tadbirlari natijalariga bag‘ishlangan yig‘ilish o‘tkazildi. Yig‘ilishga Iste’molchilar huquqlarini himoya qilish boshqarmasi boshlig‘i O‘tkirbek Mashrabov raislik qildi. Unda tuman va shaharlar mas’ullari, tegishli soha hamda hududiy tashkilotlar rahbarlari ishtirok etdi. Yig‘ilishda monitoringlar davomida aniqlangan holatlar tibbiyot, maktabgacha ta’lim, oziq-ovqat, savdo va xizmat ko‘rsatish sohalari kesimida batafsil tahlil qilindi.
Muhokamalar davomida aniqlangan kamchiliklarning kelib chiqish sabablari, ularning iste’molchilar manfaatlariga ta’siri va takrorlanishining oldini olish masalalariga alohida e’tibor qaratildi. Iste’molchilarga ko‘rsatilayotgan xizmatlar sifatini yaxshilash, qonunchilik talablariga qat’iy rioya etilishini ta’minlash, mavjud muammolarni o‘z vaqtida bartaraf etish hamda aholining huquq va qonuniy manfaatlarini ishonchli himoya qilish yuzasidan mas’ul rahbarlarning faoliyati tanqidiy-tahliliy ruhda ko‘rib chiqildi. Aniqlangan kamchiliklarni bartaraf etish, muammolarning sabablarini chuqur o‘rganish va kelgusida bunday holatlarga yo‘l qo‘ymaslik bo‘yicha aniq vazifalar belgilandi.
Yig‘ilish yakunida tuman va shaharlar, tegishli soha hamda tashkilotlar rahbarlariga monitoring natijalaridan kelib chiqib, aniqlangan kamchiliklarni belgilangan muddatlarda bartaraf etish, iste’molchilar huquqlarini himoya qilishga qaratilgan profilaktik va monitoring tadbirlarini kuchaytirish hamda amalga oshirilgan ishlar yuzasidan axborot taqdim etish topshirildi. Boshqarma rahbariyati tomonidan belgilangan vazifalar ijrosi nazoratga olinib, aholining manfaatlariga bevosita daxldor sohalarda monitoring tadbirlarini tizimli davom ettirish, xizmatlar sifati va xavfsizligini oshirish hamda iste’molchilar huquqlari buzilishining oldini olish bo‘yicha amaliy choralarni kuchaytirish belgilandi.
Mustaqillik — xalqimizning asriy orzularini ro‘yobga chiqargan, milliy g‘ururimiz va erkin hayotimizning mustahkam poydevoridir. O‘zbekiston Respublikasi davlat mustaqilligining 35 yilligi munosabati bilan Andijon viloyatida tantanali bayram tadbiri bo‘lib o‘tdi. Tadbirni Andijon viloyati hokimi, senator Shuhratbek Abdurahmonov kirish so‘zi bilan ochib, yig‘ilganlarni va viloyat ahlini ulug‘ ayyom bilan samimiy muborakbod etdi. Shuningdek, istiqlol yillarida, ayniqsa, so‘nggi davrda viloyatda amalga oshirilgan keng ko‘lamli islohotlar, bunyodkorlik ishlari, yirik investitsiya loyihalari, ijtimoiy soha va infratuzilma yo‘nalishlaridagi salmoqli natijalar alohida ta’kidlandi.
Bayram shodiyonasi davomida Vatanimiz taraqqiyoti, xalqimiz farovonligi va yurtimizdagi tinchlik-osoyishtalik ulug‘lanib, ishtirokchilarda istiqlolga shukronalik, Vatanga muhabbat va kelajakka yuksak ishonch tuyg‘ulari yanada mustahkamlandi. Tantanali tadbirning badiiy qismida esa elimiz ardog‘idagi san’atkor, O‘zbekiston xalq artisti Yulduz Usmonova o‘zining yuksak vatanparvarlik ruhidagi dilrabo kuy-qo‘shiqlari bilan ishtirokchilarga unutilmas lahzalarni tuhfa etdi. Betakror ovoz sohibasining jonli va jozibali taronalari maydonga yig‘ilgan minglab tomoshabinlarni, ayniqsa, yoshlarni birlashtirib, barchaga ko‘tarinki kayfiyat ulashdi.
Suyultirilgan gaz bilan barqaror ta’minlash aholining yoqilg‘iga bo‘lgan ehtiyojini qoplash, ta’minot uzluksizligini ta’minlash hamda iste’molchilarga ko‘rsatilayotgan xizmatlar sifatini oshirishda muhim ahamiyatga ega. Shu bois Andijon viloyatida suyultirilgan gaz ballonlarini belgilangan tartibda yetkazib berish, bo‘sh ballonlarni o‘z vaqtida yig‘ib olish va ta’minot jarayonlarini nazorat qilishga alohida e’tibor qaratilmoqda.
Viloyat hokimining topshirig‘iga asosan, Bo‘ston tumanida suyultirilgan gaz ta’minoti holatini o‘rganish va iste’molchilar huquqlarini himoya qilish maqsadida Iste’molchilar huquqlarini himoya qilish boshqarmasi boshlig‘i, tumanga biriktirilgan mas’ul O‘tkirbek Mashrapov rahbarligida tegishli mas’ullar bilan hamkorlikda SHTAB tomonidan nazorat tadbirlari olib borilmoqda.
SHTAB tomonidan mahallalar kesimida o‘rganishlar tashkil etilib, suyultirilgan gaz ballonlarining xonadonlarga belgilangan tartibda va o‘z vaqtida yetkazib berilishi, bo‘sh ballonlarni yig‘ib olish jarayonlari xonadonma-xonadon nazorat qilinmoqda.
Shuningdek, tegishli mutaxassislar ishtirokida xonadonlarda o‘rnatilgan gaz hisoblagichlarining texnik holati, ishlash jarayoni va ko‘rsatkichlarining aniqligi joyiga chiqqan holda tekshirilmoqda. Aniqlangan kamchiliklar yuzasidan mas’ullarga tegishli ko‘rsatmalar berilib, ularni bartaraf etish choralari ko‘rilmoqda.
Nazorat tadbirlari doirasida aholi xonadonlariga suyultirilgan gaz ballonlari belgilangan tartibda va o‘z vaqtida yetkazib berilmoqda. Joylarda aholi bilan muloqotlar o‘tkazilib, ularning fikr-mulohazalari o‘rganilmoqda. Xonadon egalari gaz ballonlarining o‘z vaqtida yetkazib berilayotganidan mamnun ekanliklarini bildirib, ko‘rsatilayotgan xizmatlardan rozi ekanliklarini ta’kidlamoqdalar.
Aholini suyultirilgan gaz bilan barqaror ta’minlash, xizmatlar sifatini oshirish hamda iste’molchilarning huquq va qonuniy manfaatlarini himoya qilishga qaratilgan nazorat ishlari izchil davom ettirilmoqda.
